ایران کا جوابی وار، امریکی مبینہ فضائی اڈے کو نشانہ بنانے کا دعویٰ

تہران: ایران کے پاسدارانِ انقلاب (IRGC) نے دعویٰ کیا ہے کہ اس کی ایرواسپیس فورس نے ایک ایسے فضائی اڈے (ایئر بیس) کو نشانہ بنایا ہے جسے مبینہ طور پر امریکہ کی جانب سے جزیرہ سیریک پر واقع ایک ٹیلی کمیونیکیشن ٹاور پر حملے کے لیے استعمال کیا گیا تھا۔

غیر ملکی خبر رساں اداروں کے مطابق پاسدارانِ انقلاب نے اپنے سرکاری بیان میں اس فضائی اڈے کے عین محلِ وقوع (لوکیشن) کی وضاحت نہیں کی، تاہم کہا گیا ہے کہ یہ کارروائی خطے میں بڑھتی ہوئی کشیدگی کے تناظر میں کی گئی۔

ایرانی میڈیا رپورٹس کے مطابق یہ جوابی کارروائی ہرمزگان صوبے کے جزیرہ سیریک پر امریکی حملے کے چند گھنٹوں بعد عمل میں لائی گئی، جسے ایرانی حکام نے کامیاب آپریشن قرار دیا ہے۔

پاسدارانِ انقلاب نے اپنے بیان میں خبردار کیا ہے کہ اگر ایران کے خلاف اس نوعیت کی جارحیت دوبارہ کی گئی تو اس کا مزید سخت اور فیصلہ کن جواب دیا جائے گا۔

دوسری جانب خطے میں سیکیورٹی صورتحال بدستور کشیدہ ہے۔ خلیجی ممالک میں بھی ہائی الرٹ جاری ہے، جبکہ کویت کی جانب سے اپنی فضائی حدود میں میزائل اور ڈرون حملوں کو ناکام بنانے کی اطلاعات سامنے آئی ہیں۔

تجزیہ کاروں کے مطابق حالیہ پیش رفت سے مشرقِ وسطیٰ میں کشیدگی مزید بڑھنے کا خدشہ ہے، جس کے اثرات عالمی سطح پر سیکیورٹی اور توانائی کی صورتحال پر بھی مرتب ہو سکتے ہیں۔